情人節對我黎只係365日中既其中一日，所以年年都唔會有d咩特別既活動，不過今年既情人節就好特別，因為在機緣巧合之下要一個人出街~~ 一個人出街其實無咩特別，因為我平時都會做，但正正就因為係情人節，街上既一切就好似變得唔同，而今日既我就好慶幸自己可以一個人出街，因為可以俾我更看清呢個世界。(若多一個人就會顧住傾計，咩都睇唔同架喇~~) 情人節第一幕------------巴士鬧劇 在一個小時既車程裹面，因為呢對年約40既夫婦，令我覺得呢段車程既時間起碼縮減左一半。 事緣呢對夫婦在某一個車站上車，男方一上上層既第一句就係︰「上左車妳唔好發癲呀下！」女方就一臉委屈咁跟係後面，係佢地坐低左無幾耐之後，一輪既爭吵聲就開始爆發。 女方說︰「點解你唔俾我去上？」 男方說︰「係我叫d職員唔俾妳上？」 女方更加大吵大鬧說︰「點解呀？我女都同你生埋，你應該多謝我啦，你無多謝我，仲唔俾我上。」 男方說︰「我費事妳去到搞事，搞到我份工都無埋。」 女方說︰「搞咩事呀？你係要同女人上架咩？你唔可以揀男黎上架咩？」 男方說︰「上堂就梗係有男有女架啦！」 女方說︰「好呀！咁我聽日就同d男人上囉。」 男方說︰「你都痴線架！情人節係度搞d咁既野。」 正正就係男方呢句說話，女方又開始另一個話題既攻擊，不過對話內容太多，我都不能夠盡錄。 其實係呢件事我只係想講，雙方係結婚當日應該係出於互相信任先會走埋一齊，咁何苦係數年後又要疑神疑鬼呢！就算男方真係可能有外遇，但係公眾地方大吵大鬧又有咩用？莫講話男方唔會返黎妳身邊，而自己亦無原無故做左個「醜婦」，何必呢？ 當然，我唔知當中邊個係對邊個係錯，但身為一位女性眼見另一位女性受到呢種精神折磨，你都真係絕對唔可以睇少女性對愛既那一份堅持、執著。 經過呢件事得出既結論︰「愛情魔力的確『偉大』」。 情人節第二幕-----------地鐵苦男 今次既主角係一對年不過20既情侶及女方既妹妹、爸爸及弟弟。其實，一睇就知女方係大家心目中既大小姐。 呢位大小姐手持一枝男方所送既藍色玫瑰花衝入車廂就坐低，佢既「隨從」就跟隨其後，企係佢既旁邊，大小姐就係度打機，而男方就同佢既家人傾計，點知大小姐無端端講左一句︰「你地講咩呀？」 男方話︰「無野呀！」 女方話︰「再唔講我嬲架喇！」 男方隨即講返所有既對話俾呢位大小姐聽。無幾耐，大小姐手上既遊戲機唔知咩原因跌左落地下，跟住佢就好惡咁鬧男方︰「你痴線架？」 男方就頭耷耷咁執起部機，重新遞返俾女方，而女方既眼神依然兇狠。 男方身為女方既男朋友，有時可能真係要受下氣既(雖然我唔係太認同佢既做法)，但大小姐無可能見到有位既時候，對佢既家人作出同樣既呼喝︰「坐低啦！」 聽佢地既對話，知道呢對情侶已經唔係第一年過情人節，女方亦都唔係第一次咁對待男方，所以我更加不得不佩服呢位男方既容忍度，但我確實無辦法接受堂堂一位男士俾自己既女友係眾目睽睽之下破口大罵，仲要係女方家人面前，我的確為他感到難受。 經過呢件事得出另一個結論︰「原來愛情真係盲目架！」 以上純屬個人感受，希望不會導致大家不安。 | 
